Desde mita di april SETAR conhuntamente cu DVG y Gobierno di Aruba a cuminsa cu e prome parti, esta e DVG Health Check App, pa e registracion y maneho di e personanan den cuarentena. Meta di e DVG Health Check App ta pa haya un miho bista di e casonan cu tin registra y sigui e desaroyo di e personanan den cuarentena di cerca y asina bringa e coronavirus na Aruba.
Den e di dos parti na comienso di juni, SETAR den colaboracion intenso cu DVG, HOH, ATA y Futura a traha riba e asina yama Aruba Health App cu ta enfoca riba e turistanan cu ta bin bishita nos isla. SETAR hunto cu DVG y HOH a enfoca riba e parti di salud di e app. El a wordo lansa 4 di juli 2020 y ta disponibel (den app stores di Apple y Google) pa e turistanan download prome cu nan biahe pa Aruba.
E Aruba Health App ta ofrece e turistanan diferente informacion relata na e coronavirus desde nan yegada y durante nan estadia na Aruba. Por ehempel si en caso un turista haci un test na Aruba, e turista lo ricibi su resultado dentro di 24 ora via e app. Si e test sali positivo, e turista automaticamente tambe ta drenta den e sistema di administracion di cuarentena di DVG p’asina por sigui e desaroyo di cerca.
SETAR conhuntamente cu e partnernan envolvi ta trahando riba e desaroyonan di e app pa futuro. E intencion ta pa e app aki keda crece y keda sostene e crecemento di bishitante na Aruba enfocando riba nan salud. SETAR, como nos compania nacional di Comunicacion, ta orguyoso di por aporta cu solucionnan innovativo pa yuda bringa y restringi e transmision di coronavirus na Aruba.
