E matrimonio di Renate Blauel y Elton John na Australia na 1984
Elton John a afirma cu su ex casa, Renate Blauel, solamente kier placa cu e revelacion cu e kier a comete suicido despues cu el a bise cu nan matrimonio no tabata funciona mas, net di tres dia di nan honeymoon na St Tropez, den e documentonan explosivo presenta awe den corte. E aleman cu tabata casa cu e cantante entre 1984 y 1988, a bisa cu el a tuma un overdosis di tableta di Valium despues cu e tempo ey su casa a bise, cu e kier pa e laga nan honeymoon y bay su cas bek. El a ser hiba cu urgencia hospital pa pomp su stoma, y Elton John cu ken el a casa seis luna prome, ni sikiera a bishite durante cu e tabata hospitalisa. Ora el a sali, el a ser hiba cu su ekipahe for di e porta di hospital directamente pa aeropuerto.
Elton John y Renate Blauel hunto na Strand Theatre na London na Mei 1988
E afirmacionnan a surgi awe den e documentonan presenta den Tribunal Superior na London pa Ms. Blauel, di 67 aña, como parti di su demanda pa daño y perhuicio di £ 3 miyon contra Sir Elton, di 73 aña, tocante su discusion publico di nan matrimonio. Sin embargo, Elton John a responde, pa medio di su asesor legal Jenny Afia, bisando cu e berdadero proposito di e demanda di Ms. Blauel ta pa extrae un suma grandi di placa y mancha su nomber publicamente cu mentira. E ex-pareha supuestamente a yega di bay di acuerdo pa no papia tocante nan matrimonio den publico despues di nan separacion, cu Blauel bisando cu el a busca pa deshaci di su identidad como ‘rock wife’ y biba trankilo den privacidad.
