Tres hungado di PSG a confirma como positivo na e test Sars CoV2 y nan a ser someti na e protocol sanitario apropia. Tanto e team di hungado como esun tecnico lo continua haci test den e proximo dianan, segun a ser confirma na e corant L’Equipe. AFP a logra poco despues confirma cu ta trata di Neymar, e astro brasileño y e argentineronan Ángel Di María y Leandro Paredes. PSG a anuncia dialuna di e dos hungadonan di Argentina cu a bay den cuarentena, despues cu ambos a ser identifica como ‘casonan sospechoso’. Un tercero, califica como ‘caso contacto’, tambe a ser poni den isolacion como medida di precaucion.
E anuncio ta complica e regreso riba veld di e reciente finalistanan di e Liga di Campeonnan, cu mester reanuda diahuebs awor nan training, cu excepcion di e hungadonan internacional y europeo; Mbappé, Kimpembe, Kehrer, Draxler, y e tres hungadonan den cuarentena. Segun e protocol sanitario di e Liga di Futbol Profesional (LFP) actualmente den vigor, e hungadonan cu a test positivo mester keda den cuarentena durante 14 dia. E protocol actual ta establece ademas cu for di e cuatro casonan detecta den ocho dia consecutivo (entre hugadonan y cuerpo tecnico), e realisacion di entrenamento colectivo no ta ser permiti, cu por haci cu lo pospone e weganan.
