Un YouTuber di 20 aña cu ya ta gana £ 100,000 pa aña y cu a tiña su mascota blauw, a ser nombra como e presentador number 40 di Blue Peter, den e ultimo bid di BBC pa refresca e programa di mucha cu ta existi pa 62 aña. Adam Beales, cu ya tin casi tres miyon di viewers riba su Adam B feed, a ser contrata pa BBC den e intento pa renoba e programa di television pa mucha.
Beales cu a cumpra un cas recientemente di £ 165,000 pa su mayornan, lo ser presenta oficialmente diahuebs awor hunto cu e alineacion actual; Lindsey Russell, Richie Driss, Mwaka Mudenda y Henry the dog. Den compania di su ruman chikito y su mayornan, Beales a bisa: “Mi ta sinti asina straño pa bisa esaki ‘all out’ mientras cu nos a wante secreto for di februari”. BBC a tuma contacto cu Beales pa prome biaha na december aña pasa, net prome cu Pasco, y a puntr’e si e ta interesa pa haci audicion pa un rol di presentador den Blue Peter.
Di mes el a contesta si y despues a haci e screen test aunke e tabatin ‘jet lag’ di un biahe largo. El a pensa cu e tabata mustra teribel, pero ta parce cu si nan a guste. Aproximadamente tres siman despues el a haya sa cu e tin e trabou, otro fun fact ta cu el a haya e yamada cu e tin e job, net ora e tabata haciendo un di ultimo viewings pa cumpra e cas pa su mayornan. E editor di e show a bisa cu Adam realmente a impresiona nan durante su audicionnan. E ta natural dilanti camera pero tambe e ta hopi dibertido y briyante cu e muchanan. Kisas tambe un poco travieso cual e audiencia di Blue Peter lo keda completamente encanta cu ne.
