Awe mainta hopi mucha tabata mustra contento di bolbe scol pa un aña escolar nobo. Mesun contento cu e muchanan tabata pa topa bek cu nan amigo- y maestronan, e tabata un sentimento di preocupacion pa hopi mayor pa nan yiu(nan)bolbe scol memey di un crisis serio di salud. Apesar di esaki e rednan social awe mainta tabata repleto di post di e mayornan deseando tanto nan yiu como yiu di nan famia y amistadnan, un aña escolar exitoso.
Nos Prome Minister, Evelyn Wever-Croes, den su mensahe riba facebook, a desea tur alumno y docente hopi exito den e aña escolar 2020-2021, cu ta cuminsa despues di poco atraso. Cu esaki ta un aña cu retonan, y e ta spera cu nos lo por mira atras na final como un aña exitoso, y el a finalisa: “Dios bendiciona boso tur”.
No pa tur mucha awe tabata e prome dia di scol debi segun e decision di SKOA ta 50% di alumno por ta na scol. E alumnonan ta parti den dos grupo y cada scol a organisa esaki segun nan planificacion con e alumnonan ta bin scol. E mayornan por a haya informacion riba e pagina di Facebook di e diferente scolnan. Si tuma como ehempel St. Paulus School cu a comparti riba nan Facebook, con nan a organisa e entrada na e scol segun e reglanan pa tin distanciamento fisico entre mayor, maestro y otro alumnonan.
Riba e website www.arubacovid19.org tin tur informacion di Directie Volksgezondheid Aruba den e seccion di Educacion. E ta na hulandes y aki tanto e mayor-, maestro- y alumnonan por haya informacion importante di e ‘preventieve maatregelen’ cu ta crucial pa yuda garantisa cu tur hende ta ‘safe’.
