Durante siman di 24 pa 28 di augustus e miembronan di Women empOwering Women a organisa e ‘WOW Gives Back Workout Challenge’ cu e meta di recauda fondo pa e iniciativa di CEDE Aruba ‘Happy To Give Back’.
‘Happy To Give Back’ ta yuda e banconan di cuminda y e gruponan vulnerabel den nos comunidad por medio di donacion. Nan meta tabata pa organisa e ‘WOW Gives Back Workout Challenge’ cu e intencion di promove actividad fisico entre e miembronan y comunidad, y na mes momento aporta na un causa cu merece su atencion door di e crisis actual.
Pa 5 dia durante e siman aki cada miembro lo mester a completa un plan di ehercicio. Cada ehercicio tabatin un balor minimo di AFL. 20,00, unda cu mester a busca un sponsor diario y asina yega na meta di AFL. 100,00 na final di siman pa cada miembro. Por medio di e ‘WOW Gives Back Workout Challenge’ nan 38 miembro hunto cu sosten di famia, amistad y diferente compania local a logra recauda e bunita suma di AFL. 6.588,00 y asina contribui na e causa aki.
Nan ta hopi satisfecho y contento cu e aprecio pa e iniciativa aki di nan miembronan, sponsors y CEDE Aruba. E ta nan meta pa sigui empodera e sernan femenino pa haci impacto positivo den nos comunidad. Organisacion Women empOwering Women ta extende palabra di gratitud na e comerciantenan local cu a aporta na ‘WOW Gives Back Workout Challenge’.
