Un estatua nobo cu ta representa e first lady di Merca, Melania Trump, ta poni bek na Slovenia, cuna di e esposa di presidente di Merca, pa reemplasa e escultura anterior di madera. E obra original a ser kima na juli como un rechaso pa e politica di su casa, Donald Trump. E biaha aki e escultura ta di brons, cu ta mas dificil pa destrui, y esaki a ser presenta awe durante un ceremonia chikito, segun e television publico di Slovenia TVSlo.
“E estatua aki ta dedica na e memoria eterno di e monumento pa Melania Trump cu tabata na mesun lugar aki”, ta skirbi riba e plaque cu ta hunto cu e monumento, un replica di e anterior, diseña pa e artista americano Brad Downey. E Melania nobo ta para na un tamaño natural riba un base di madera den un campo di e localidad di Rozno, cerca di Sevnica, un ciudad na este di Slovenia unda e ex modelo a biba durante su infancia. E figura, cu un cara plat sin rasgo, ta saluda cu man na halto, den un postura cu ta recorda tempo cu su casa a asumi e presidencia na Merca na 2017. Pero si e Melania di madera, crea pa e artista esloveno Ales ‘Maxi’ Zupevc, tabatin un shimis pinta den blauw, manera cu e primera dama tabatin bisti dia e ceremonia cu Donald Trump a tuma su posesion como presidente, esun awor di brons ta completamente monocromatico, sin color.
Segun TVSlo, e artista ta consider’e como un “anti-monumento, un contra-propaganda”, pa expresa un mensahe critico riba e politica di Donald Trump, principalmente riba e tema di migracion, pues e estatua ta tambe un recordatorio cu su casa a yega Merca como inmigrante. Na e inauguracion di e monumento a ser reparti pidanan di bolo yama ‘Melania’, un di e numeroso productonan local di Sevnica, cu ta hiba e nomber di nan ciudadano mas famoso. Na januari, una figura di madera cu ta representa Donald Trump tambe a ser kima pa desconocidonan den un pueblo cerca di Liubliana, unda el a wordo poni un luna prome, cu segun su creador e esloveno Toni Schlegel, e tabata pa denuncia e auge di populismo na mundo.
