El a ilustra tres portada di revista FOCUS y cada un tabata un etapa special den su bida. Riba e special di ‘throwback’ awe lo trece bek e entrevista di Jerusha Rasmijn ‘manera el a sali publica’ den edicion di september 2015, celebrando e tempo ey 20 aniversario di revista FOCUS.

Desde cu Jerusha Rasmijn a conkista e corona di Reina di Carnaval di Aruba 1987, el a comberti di anochi pa mainta den un persona super popular y pa pone e cherry riba e bolo, ta ora el a haya su corona como Miss Aruba 1992. Un hende muher den luz publico pa mas di 28 aña, unda actualmente e ta manehando e departamento di Aruba Convention Bureau di ATA, como ACB Conference & Events Manager. E ta defini su mes como un muhe mas sigur ¡ Un mama, yiu,  ruman y tanta agradecido. Orguyoso di su pais. Un amiga y un colega  incondicional, leal, positivo y dedica na su pasion pa bida y profesion cu semper kier brinda tur dia lo mihor pa Aruba.

Jerusha a ilustra tres portada di revista FOCUS y cada portada tabata special, unda a ilustra  un etapa den su bida. Un mama, esposa un amiga incondicional. El a crece y por a refleha, felicidad, paz y trankilidad. Tempo cu el a sali riba portada, despues di su divorcio, tabata un etapa dificil, pasobra ora tin divorcio semper ta causa panico y inseguridad. El a tuma e responsabildad grandi, di ta mama soltero cu 2 yiu chikito. Despues e siguiente portada tabata un etapa importante, na unda  el a evoluciona y el a siña di e experiencianan bon y menos bon, cual a pone ta mas sigur y sa den ki direccion e kier bay.

Bo a toca un premio hopi special pa FOCUS cu ta FOCUS PERSONAHE 2009 – Ki e premio aki ta significa pa Jerusha Rasmijn?
Aña 2009 un aña hopi special pa mi persona. Den mi trabou mi a wordo reconoci pa e Simon Oduber jr Award y na final di aña cu e grato sorpresa di Focus Personahe!  E ta un bunita reconocemento presenta pa un di e prome revista local cu mas di 20 aña di existencia, cu ta reconoce talento y e profesionalnan local y semper ta destaca den un of otro forma. Ta un elogio pa mi a worde reconoci como muher den mi profesion y den tur mi etapanan!


E portada di juni 2004 tabata unda bo a dicidi pa ta soltero atrobe… awor despues di 11 aña bo ta soltera ainda?
Si soltero, pero cu un compromiso fuerte y firme cual ta mi dos yiunan. Esey ta un compromiso pa semper, nan ta mi razon di bida, mi inspiracion y mi forza cu mi ta  lanta tur dia y sigui dilanti den tempo bon y menos bon tambe. Mi no ta kita e posibilidad di por conoce un persona den futuro.


Bo carera profesional – ki ta bo posicion actual na ATA y ki ta bo reto como muhe profesional y mama…!

Hende muher mester constantemente keda on top, mehora y supera e expectativanan. E balans  di maneha tempo entre responsabilidad di famia, cuido, educa y guia mi yiunan  pa  por cumpli cu mi reponsabilidad como  mama y mi carera.  Pa mi por a logra esaki  mi mester menciona un danki pa apoyo incondicional di Teresa (nani) y mi mama, ya cu su sosten mi por a logra.

LEAVE A REPLY

Please enter your comment!
Please enter your name here