El a tuma e actriz Charlize Theron añanan di discrecion prome cu el a dicidi pa presenta oficialmente su yiu muhernan. Aunke e actriz a bira mama 8 aña pasa ora el a adopta su prome yiu muhe, nunca el a mustra nan abiertamente na e publico. P’esey su siguidonan a haya un gran sorpresa ora e actriz a comparti pa prome biaha un potret di su yiunan, cu el a adopta algun aña caba y cu nunca a mustra un potret di nan door cu e sa ta hopi reserva cu su bida personal.
E motibo cu e actriz Sur Africano a presenta su yiunan ta en conexion cu e celebracion di ‘National Daughters Day’, un dia cu el a probecha pa expresa su amor pa su yiu muhernan. El a skirbi riba su Instagram cu su curason ta pertenece na e dos criaturanan aki cu ta bunita y poderoso. Nunca e lo bolbe ta mescos y el a desea su yiunan un feliz dia. Un di e rasonnan pakico Charlize ta cuida e privacidad di su yiu muhernan ta door cu su yiu, Jackson, ta transgender. Desde cu e mucha tabata chikito, e actriz tabata cuidadoso cu su imagen pa evita sensacion den media.
Den un entrevista aña pasa e actriz a declara cu su yiu muhe tabata esun cu a pidi pa stop di considera cu e ta un mucha homber, ora e tabatin tres aña di edad. El a bisa e tempo ey cu e tambe tabata pensa cu e tabata un mucha homber, te ora e tabatin 3 aña cu el a wak’e y bis’e: “Mi no ta un mucha homber!”. Charlize a adopta Jackson ocho aña pasa y tres aña despues a bin acerca August, cu algun siman pasa a ser mira brevemente durante un celebracion virtual di e actriz, sinembargo, e no a yega di presenta nan formalmente te cu awo.
