Durante di luna di october 2020, internacionalmente reconoci como Breast Cancer Awareness Month, empleadonan di Aruba Bank ta bisti na roos pa yuda crea concientisacion di Cancer di Pecho. Breast Cancer Awareness Month ta un campaña internacional di salud organisa pa diferente organisacion di cancer di pecho tur luna di october, pa conscientisa riba e enfermedad aki y pa recauda fondo pa investigacion riba su causa, prevencion, diagnostico, tratamento y cura.
Na Aruba e campaña aki andando caminda cu diferente instancia ta brinda informacion y sosten na esunnan cu di un manera of otro ta afecta pa cancer na pecho, sea victima of famia di victima. Intencion di e campaña aki ta pa educa riba e importancia di haci testnan tempran. Empleadonan di Aruba Bank, e banco cu ta carga nomber di nos pais, ta para un rato keto pa mustra solidaridad y sosten na e bon causa.
