Tres dia di luto nacional a ser decreta pa e gobierno argentino pa e fayecimento di ex-astro di futbol, Diego Armando Maradona, cu a muri diaranson despues di a sufri un paro cardiorrespiratorio. Maradona, ken den e ultimo añanan a desempeña como director tecnico, a muri cu 60 aña di edad na su cas na Buenos Aires, unda el a bay pa su recuperacion despues di e operacion den su cabes. E noticia di e morto di Maradona a shock e mundo di futbol. E ta reconoci pa experto-, colega- y fanaticonan como e miho futbolista den historia. El a hiba un bida enfrenta cu problema di salud y di su adicionnan.
E abogado y amigo di Maradona, Matías Morla, a denuncia un posibel negligencia medico. A traves di su Twitter, Morla a denuncia e situacionnan di a hiba Maradona na su morto, pa cual ta exigi pa esaki wordo investiga te na su ultimo consecuencianan. E ta bisa cu ta inexplicabel cu durante 12 ora su amigo no haya atencion ni control di parti di e personal di salud, cu a pone yega na e final aki. E ambulans a tarda mas di mey ora pa yega, loke e ta califica como ‘una criminal idiotez’. E hecho no por ser wordo ignora y e ta bay pidi pa investiga te na final di e consecuencianan. Manera cu Maradona tabata bise: vos sos mi soldado, actúa sin piedad”, e abogado a manifesta a traves di un comunicado.
Otro hecho cu a wordo condena fuertemente pa entre otro e periodista argentino, Mauricio Luna, ta con e trahadonan di e funeraria Piner a post potret di Diego Armando Maradona den su caha di morto. E trahadonan a probecha mientras cu tabata prepara e caha di Maradona, prome cu a hib’e na Casa Rosada pa su velorio, pa saca potret hunto cu ne. Esaki a los un ola di rabia y indignacion di e pueblo argentino. Tabata di spera tambe cu e abogado di e ex-astro di futbol a lansa un ultimatum. El a afirma cu e ta bay ocupa personalmente di haya e ‘canalla’ cu a saca e potretnan ey. Tur esunnan responsabel ta bay paga pa e semehante acto di cobardia.
