E miembronan di Fundacion Pa Promove Cultura na Honor di Padú Lampe, cu gran satisfaccion por anuncia cu finalmente e buki ‘E Arte di Padú Lampe’ a yega Aruba. E ta un obra magistral riba su mes, compila y skirbi pa e artista y docente di arte Stan Kuiperi. Diabierna ultimo, 27 di november a tene un presentacion oficial chikito den cumplimento cu e protocol vigente. E ocasion a tuma luga na Patio 15 den presencia di Padú su yiu Vivian Lampe y nieta Sonia Anaya.
A comisiona e buki aki como parti di e conmemoracion di e centenario di Padú Lampe dia 26 di April 2020. Dedica na su carera como artista pintor autodidactico durante trayecto di 8 decada di su bida, e buki ta ilustra e coleccion mas grandi di Padú su obranan cu un splicacion di su diferente estilo, etapa y tecnica; na Papiamento y tambe Ingles, pa asina dun’e un mayor capacidad di difusion.
E ta un excelente regalo pa amante di arte, studiante y bishitantenan di Aruba. E diseño grafico ta di Steffen Maas, kende a haci un excelente trabou di punta pa punta den capta e esencia di Padú a traves di un buki, cu ta completamente na color.
Entre e prome copianan entrega tin esnan na Su Excelencia Gobernador, Alfonso Boekhoudt, y na Prome Minister, Evelyna Wever-Croes, Minister di Enseñanza y Minister di Cultura; sigui pa director y e miembronan di directiva di UNOCA y Prins Bernhard Cultuurfonds, cu a haci e produccion di e buki posibel. Tambe a presenta un copia na miembro fundador y honorario di e Fundacion Padú Lampe, Sra. Landa Cohen-Henriquez.
Entre e diferente proyectonan cu ta trahando riba dje, e fundacion tin planea tambe pa 2021, un anochi pa publico den hardin di departamento ‘Arubiana’ di Biblioteca Nacional. Aki, Kuiperi lo duna un charla expositorio riba e arte di Padú. Mientrastanto e buki ‘E Arte di Padú Lampe’ ta obtenibel na Van Dorp, Patio 15, cerca autor Stan Kuiperi y miembronan di e fundacion na 50 Florin. Pa keda na altura di e desaroyonan rond di Fundacion Padú Lampe, ta invita un y tur pa sigui nan pagina di Facebook. Fundacion Pa Promove Cultura na Honor di Padú Lampe su obhetivo ta salvaguardia, digitalisa, proteha y comparti e composicion, cancion, pintura, potret y bukinan di e legendario Juan Chabaya Lampe.
