Alicia Machado a revela den fin di siman un noticia tristo riba su rednan social, cu nan a haya e restonan di su ruman mas jong, Arturito Jr., cu tin un aña desapareci. Den un post di Instagram cu el a acompaña cu un potret unda ta aparece varios bela cu e imagen di e Virgen di Guadalupe, Miss Universo 1996 a revela e tragico noticia.
E ruman di Alicia, Arturo Machado Zambrano, ta e menor di su famia, yiu di su tata Arturo Machado, cu a fayece aña pasa di un asesinato. E corantnan venezolano a reporta diahuebs cu a haya dera un ‘osamenta’ humano den e sector di Maco Maco, den e municipio di San Diego na Estado Carabobo. Na e sitio di e crimen a haya e cedula di identidad di Arturo José Machado Zambrano, un debit card y un credit card, dos sim card di un celular y un carson.
Un dia despues di e post, Alicia Machado a gradici e palabranan di condolencia di varios di su compañeronan den e medio artistico. Alicia den su mensahe a priminti cu semper e lo hiba su ruman den su curason, como e mas sincero amor di ruman. Ademas el a manda condolencia pa e mama di Arturito Jr., dunand’e di compronde cu nan tabata mitar ruman y a pesar di esey, entre nan dos a existi un gran cariño.
