E bendicion di mas grandi cu un ser femenino como masculino por haya, ta esun di un yiu. E ta un tradicion cu den edicion di december, revista FOCUS ta presenta algun di e babynan cu a nace durante e aña. E ta un di e seccionnan di mas bieu, pero masha gusta pa tur hende. Sinembargo cu e situacion cu nos ta bibando actualmente, e biaha aki no tabatin nos famoso photoshoot, unda e babynan ta wordo acompaña pa nan mama, tata y hasta otro miembro di famia, ya cu nan baby ta sali den FOCUS. Loke ta resalta tur aña ta e entusiasmo di e mamanan, cu ta prepara tanto nan mes como nan prins of prinses pa ambos luci impecabel.
E ta un momento bunita pa comparti e alegria di e bendicion di un yiu, y por lesa e retonan pa haya un baby memey di un pandemia. Hasta tin un di e mamanan cu wordo contagia cu Covid-19 net algun siman prome cu e ta bay haya su baby. Interesante pa lesa loke tur e mamanan ta comparti di nan experencia sea cu ta nan prome baby of di dos miembro di e famia. Baby ta keda nificacion di bida nobo, bendicion na abundancia y alegria sin fin den cualkier hogar y un ser humano cu abo como mayor tin oportunidad pa forma segun bo norma- y balornan, creencia, tradicion, principio y amor.
