E celebracion di e temporada di Pasco y Fin di Aña e aña aki lo ta hopi diferente pa e famia di Minister President, mirando cu ta e prome Pasco sin su subrina. Den e edicion di Focus Digital di december, Evelyna Wever-Croes, ta repasa en breve aña 2020 cu tabatin hopi reto pareu, di cual indudablemente e reto mas mas grandi tabata di keda trankil y inspira confiansa y optimismo. P’e personalmente tabatin un reto increiblemente grandi, dia 15 di mei, memey di e pandemia, su unico subrina di 11 aña, Angelina, a fayece.
Den e temporada aki nan ta custuma cu e ta centro di atencion, e ta esun cu ta haci oracion prome cu nan come, y e hunto cu su yiunan ta canta y deleita nan cu e canticanan di Pasco. Nan lo celebra sin dje, pero nan lo celebra si, pasobra nan ta agradecido pa tur esunnan cu ta den nan bida ainda. Nan lo celebr’e na forma mas priva y intimo e aña aki. Pa locual ta e celebracion di Fin di Aña ta bay ta hopi diferente. E Dande cu ta tradicional den nan famia, e celebracion cu Grupo di Betico, e tantisimo bishitanan, lo no por tuma lugar e aña aki, manera nan ta custuma.
Nos Minister President ta comparti su pensamento cu nos lo mester pensa bon, con por haci e celebracionnan aki, sin kibra nos tradicionnan, pero na forma cauteloso. Covid ta bay keda pa un tempo ainda, y pues nos mester siña biba cu ne y keda cauteloso. Nos kier evita cu pa cualkier descuido nos ta plama e virus atrobe na Aruba. Pero e sentimento di celebracion di Pasco y Fin di Aña, ta algo cu nos ta carga den nos curason. y esey, ni Covid, por kita di nos.
Lesa e entrevista completo cu Minister President, Evelyna Wever-Croes, den edicion di Focus Digital. E revista ta disponibel a traves di FOCUS Digital App, cu ta acesibel via Apple Store of Google Play Store, cu por download e aplicacion aki riba bo smartphone of tablet.
