E deseonan di e hendenan rond di mundo deseando un Feliz Año Nobo y e celebridadnan tambe a comparti nan mensahe pa asina duna bonbini na 2021 yen di speransa y animo. Aña 2020 tabata uno dificil pero e mundo a sigui dilanti enfrentando tur e retonan. A traves di nan rednan social un cantidad di caranan conoci a comparti cu nan siguidonan con nan ta duna bonbini na un Aña Nobo.
E popular artista Arubiano, Ataniro, a comparti riba su Instagram, un potret romantico hunto cu su casa. El a skirbi su mensahe cu e ta duna danki na aña 2020 cu a dune e oportunidad pa gana y siña den tur aspecto di bida. Cu e experencia cu el a ricibi for di e aña ta uno cu pa semper lo e hiba cu ne y por aplica esaki den cada huki cu e haye aden. Su mensahe ta largo pero el a comparti palabranan for di fondo di su curason.
E presentador di e programa Strea di Fin di Aña, Sandra Croes, a comparti un potret hunto cu su dos yiu muhenan, Kassandra y Stephanie Suarez, tanto riba su Instagram como su Facebook. Su deseo ta pa e Aña Nobo aki ta uno yena cu amor, paz, felicidad y principal salud y bendicion pa un y tur. Cu Fe firme y speransa cu 2021 lo ta un miho aña.
E prome finalista di Miss World 2001, Zizi Lee, a post un potret black&white saca hunto cu su famia na Belgica. Su deseo ta cu esaki ta un aña den cual nos tin suficientemente curashi pa acepta e amor y beyesa cu ta rondona nos y pa sigui lucha pa loke ta haci nos curason bati na un ritmo acelera. El a cera cu Bendicion pa 2021.
