Un Aña Nobo ta habri cu e publicacion di Focus Digital cu su contenido carga di optimismo y energia positivo. Riba e portada ta ilustra Miss Aruba, un hende muhe humilde, pero cu forsa, energia y determina ora e enfoca pa logra su metanan principal. Entre su soñonan ta pa e ta e proximo Miss Universe, e titulo ta exigi ta sinonimo di Helen Hernandez. Un articulo interesante cu ta habri e edicion di januari ta 11 resolucion cu por haci pa e Aña Nobo, si bo ta desea pa biba un miho bida. Por parce cu algun ta curioso of hasta no aceptabel na prome instante, pero e autor ta sigura cu si bo haci esaki, pronto lo bo wak con bo bida ta mehora tanto na nivel personal como profesional.
Rocío Burgos ta splica con el a desaroya e concepto di un agencia estilo boutique, unda cu nan proposito, vision y meta ta central. Cu su experticio den ‘branding’ e ta comparti cua ta e do’s and dont’s pa un marca personal y tambe su habitonan pa logra ta exitoso. E graduacion di Zia Habibe ta elabora riba su tesis cu e meta general tabata pa haya sa si e studiantenan di Universidad di Aruba, cu a yena su investigacion tabata sinti stress di scol, y con nan tabata scoge pa enfrenta esaki. E dean di e facultad di Hospitality Tourism Management Studies, John Wardlaw, a entrega Zia e diploma y esaki ta e prome biaha cu e facultad ta entrega e diploma na cas di un studiante.
For di Boneiro tin un bunita reportahe cu Miss Aruba 2006, Melissa Laclé, cu ta conta con su bida a cambia pa uno miho y cu el a haya su ‘one person’ pa semper. Un bida yena cu mas amor y aprecio pa otro. Y no solamente di su casa Jonathan Croes, paso el a gana mas famia y amistadnan den su bida. Dia 24 di augustus nan baby Kylo Jay a nace y Melissa ta conta con el a pasa durante su embaraso y su parto cu e mester a biaha cu urgencia pa Corsou.
Despues di pasa 3 Fin di Aña na Hulanda, Guillfred y Siglaine Besaril a dicidi di bin celebra nan bendicion hunto cu nan famia na Aruba. Den un manera creativo e pareha, cu un mail den nan inbox di Santa Claus, a comparti e noticia riba nan red social cu tin un baby na caminda. Aunke Siglaine lo tin gana di tuma e credito pa esaki, pero den tur honestidad e ta bisa cu esaki ta Guillfred y su creatividad.
Durante un di e anochinan mas esplendido di 2020, Gigliola Designs a presenta su coleccion ESCAQUE, cu ta inspira riba e muhenan poderoso cu ta representa e union, forsa y elegancia di e muhe actual. Cu hopi sentimento Gigliola a sa di crea un coleccion den un temporada dificil, unda ta nace bek un muhe nobo, cu cada dia ta reinventa.
Den edicion di januari por lesa entrevistanan interesante cu e.o. Angelo Domacassé for di Boneiro y Veronica Pichardo for di Corsou. Silvester Werleman e creador di e coronanan di Dande, y manera tur aña e revista ta scoge personanan for di diferente area pa comparti nan resolucion pa 2021. Tin tambe un bunita reportahe di e enlace matrimonial di Amerey Tromp y Marc Giel. E seccionnan mensual cu nan topiconan super interesante skirbi pa Jessica Wolter, Daniela Kuipers-Ramos y Dina Alexander.
FOCUS Digital ta acesibel via Apple Store of Android Google Play Store, cu por download e aplicacion aki riba un smartphone of tablet. E revista ta ‘gratis’ y sigur un experencia unico pa ‘browse’ y lesa e revista preferi di Aruba, cu tin su contenido cu calidad manera semper.
