E documental ‘Robin’s Wish’ ta explora Lewy Body Dementia, cu a hiba Robin Williams na su suicidio na augustus 2014. E ultimo dianan di e comediante tabata desesperante. Esaki ta loke e documental ta mustra y ya ta disponibel riba e plataforma Filmin. E material, lansa seis aña despues di e morto di e actor, ta mustra e ultimo dianan di Robin Williams, cu tabata sufri sin tabata sa di Lewy Body Dementia, un enfermedad mental, cu entre otro ta causa ansiedad, paranoia, insomnio, depresion y cu finalmente a hib’e na comete suicidio.
Den e documental dirigi pa Tylor Norwood, e neurologo Bruce Miller ta splica cu den e final di su dianan, e cerebro di Robin Williams tabata hopi afecta. “Mi tabata wak con el a afecta su cerebo. Mi a ripara cu esaki tabata e forma mas teribel di Lewy Body Dementia, cu mi a yega di wak. No tabatin niun area cu no tabata afecta. Mi tabata hopi sorprendi cu Robin por a cana y move”, Miller a comenta, ken a describi e padecemento como devastador, mortal, rapido y progresivo. E documental tin un obhetivo hopi cla: limpia e nomber di Robin Williams y su suicidio. P’esey gran parti di e material ta dedica na explora e enfermedad cu a hib’e na kita su bida.
