E famoso presentador di television mericano, Larry King, a muri awe na edad di 87 aña den Cedars-Sinai Medical Center na Los Angeles, unda el a wordo interna despues di a contagia cu coronavirus. Ora Media a anuncia cu profundo tristesa e morto di nan co-fundador, host, y amigo Larry King, den un post cu nan a share riba Twitter di King. Aunke e comunicado oficial no ta revela e causa oficial di Larry King su morto, segun NPR, King a ser hospitalisa recientemente cu COVID-19.
Durante 63 aña y riba e plataformanan di radio, television y e medionan digital, e miles di entrevista, premio y elogio mundial di Larry King ta un testimonio di su talento unico y duradero como presentador. Ademas, aunke tabata su nomber cu ta aparece den e titulonan di e programa, Larry semper a wak e temanan di su entrevistanan como e berdadero streanan di su programanan, y e mes como un simpel canal imparcial entre e invitado y e audiencia.
E comunicado ta continua: “Si e tabata entrevistando un presidente di Merca, un lider extranhero, un celebridad, un personahe escandaloso of cualkier persona, Larry tabata gusta haci pregunta cortico, directo y simpel. E tabata kere cu preguntanan bon pensa usualmente ta brinda e miho contestanan y e no a ekiboca den e creencia ey”. Larry King a presenta e celebre “Larry King Live” cu e cadena di television CNN durante mas di 25 aña.
E ta muri cinco luna despues cu dos di su yiunan a fayece den zomer di 2020: su yiu homber Andy (65) di un infarto y yiu muhe Chaia (51) di cancer di pulmon, cu 23 dia di diferencia. Larry tambe a lucha contra cancer di pulmon y e noticia di e hospitalisacion di Larry King door di COVID-19 a ser informa dia 2 di januari. “Larry a lucha contra hopi problema di salud den e ultimo añanan y tambe ta luchando duro contra esaki, e ta un campeon”, un famia a bisa e momento ey na ABC News. E detayenan di e entiero y ceremonia di e presentador, lo ser anuncia despues y e famia a pidi privacidad den e momentonan aki.
