Eva Mendes ta alehando un tempo for di e rednan social despues cu su yiu muhenan a acus’e di uza ‘demasiado’ su telefoon. E strea di ‘Hitch’ tin Esmeralda (6) y Amada (4), cu su casa Ryan Gosling, y el a bisa cu e ta bay dedica menos tempo cu e ta pasa pega na su telefoon, pasobra su yiunan kier pa e ta mas ‘presente’ den nan bida. Eva a haci e confesion ora el a comparti un post riba su Instagram di un Twitter account yama Latinx Parenting, cu tabata bisa: “Laga bo yiunan yama bo atencion. No ta un falta di respet”.
“Ta saludabel. E muchanan por ta alinea asina firme cu nan balor, cu nan no ta tuma nada menos cu e respet cu nan merece. Nan no ta acepta BS. Ni sikiera di bo. Felicitacion, bo ta criando un mucha empodera”. Y hunto cu e post, Eva a skirbi: “Danki na @latinxparenting pa e importante recordatorio aki”. Mientrastanto, e actriz di 46 aña a insinua recientemente cu kisas e lo bolbe actua pronto, despues di a tuma un descanso pa cria su yiu muhenan.
Eva a bisa na october: “Mi ta sinti manera, te unda ta mi ambicion, e no a disparce, simplemente el a shift na mi yiunan. Mi ta aplaudi y admira e muhenan cu por haci tur cos, pero mi no ta un di nan”. E actriz a comparti tambe cu e ta agradecido cu e tin e opcion di no mester traha y el a realisa con afortuna e ta cu esey ta hasta un escogencia. Cu e ta feliz di por a incuba cu su babynan, pero awo cu nan tin cuater y seis aña, e ta cuminsa sinti cu su ambicion ta regresando.
