Paris Hilton probablemente lo mester sigui su soño riba su mes. Esaki ta debi na patriarca di e famia Hilton, Barron Hilton, e welo di Paris cu a termina lagando 97% di su patrimonio na e Fundacion Conrad N. Hilton, ora cu el a muri na september 2019. Resultado di esaki ta cu el a laga solamente 3% pa dividi entre e otro herederonan. Esaki no tabata e plan. Barron tabata cla pa laga su patrimonio total di $ 4.5 mil miyon na su famia. Segun e informacionnan, el a cambia di opinion na 2007 despues di a sinti berguensa di su nieta, Paris, pa loke el a haci cu e nomber di Hilton.
Paris Hilton a lansa un documental nobo y controversial, This Is Paris, pa mustra mundo e muhe tras di un ‘personahe’. Pero den e documentario e ta revela tambe e detayenan profundamente personal durante su etapa bishitando e scol Provo Canyon School (PCS), cu door di su comportacion el a ser hiba na e scol tempo cu e tabata adolescente. Loke a cuminsa como un documentario pa aclarea e concepto fout cu tin riba su FAMA mundial, e ta pa mustra cu e ta mucho mas inteligente cu un stem di baby proyecta den e reality tv ‘The Simple Life’ y su slogan: ‘That’s hot’, produciendo e documental ta manera un terapia cu e strea a permiti pa discuti publicamente como algo cu el a blokia inconscientemente durante hopi tempo.
Door di e influencia di Paris, e mester ta semper atento di e intencionnan berdadero di e hendenan cu anda rond di dje. Un di escenanan memorabel ta unda cu por mire cu un ‘stack’ di Macbooks rond di dje, manera cu e ta papia over di esaki ta, cu cada bes cu e tin un guy nobo, e mester haya un computer nobo door cu varios di su guynan ta purba di hack su computer y purba di haya e informacionnan personal di dje.
E strea ta purba di consola su sentimentonan di intenso soledad y desaliento: “Tin ora mi no sa ni sikiera ken mi ta mas”, Paris a bisa. Su obhetivo ta pa converti den un biyonario; su ruman muhe (Nicky Hilton Rothschild) ta yame ‘greedy’. Ora e tabata adolescente cu e tabata scapa pa bay e clubnan na New York, e mama di Paris, Kathy, a bisa cu e tabata kere cu e tabata den su camber. Finalmente, su mayornan a hibe na e scol na Utah, Provo Canyon.
Den e documental, Hilton ta revela di e abusonan cu e mester a tolera. E tabata bisa cu hopi di e muchanan ta ser humilia: “tortura e muchanan y mira nan sunu”. E ta afirma cu el a bay Provo Canyon School, unda cu el a ser abusa fisicamente y mentalmente; golpia y obliga pa pasa tempo su so den un camber di aislamento y obliga pa tuma prescripcion di remedi, cu e no tabata sa kico nan tabata e tempo ey. Tambe tabatin hopi otro cos cu tabata pasa eyden, el a afirma.
