Pamela Anderson a casa cu su ‘bodyguard’ despues di a namora durante e lockdown di coronavirus, segun a keda revela. E ex-beyesa di Baywatch a casa pa di cuater biaha y awo cu Dan Hayhurst, un constructor na su ciudad natal, den un ceremonia intimo riba e terenonan di su cas na Vancouver, Canada, riba Nochebuena. Durante un entrevista, Anderson a bisa na DailyMailTV: “Mi ta exactamente unda mi mester ta, den e brasanan di un homber cu realmente ta stima mi”. E strea a comparti tambe e potretnan impresionante di su casamento, compartiendo un look intimo di su dia special.
Anderson, cu ta Canades, ta hari den e snap shots di su bruid durante e ceremonia realisa pa un pastor di su ciudad, mientras e pareha tabata lesa nan promesanan. E boda tradicional a wordo celebra den e patio patras di e propiedad cu Anderson a cumpra fo’i su welonan na Ladysmith, na e banda oost di Vancouver Island. Pamela a nace na Ladysmith, un pueblo di piscado aleha na British Columbia na aña 1967. El a wordo cria eynan, te ora cu el a haya e oportunidad cu Playboy, el a muda pa Los Angeles.
E eterno beyesa a bisti un shimis di bruid vintage blanco, cu manga ruffle, velo largo y un bouquet chikito di rosa blanco y ros, Anderson a luci esplendido den su shimis simpel y elegante, mientras su casa a bisti mas informal, cu carson preto y camisa blanco. Anderson a conoce Hayhurst, cu tabata biba na Vancouver Island, durante e cuminsamento di lockdown aña pasa. Desde 1 di juli 2019, Pamela ta biba na Ladysmith, unda el a inverti $ 1miyon den e propiedad cu e ta posee y el a renoba esaki na su smaak. E bodyguard, Dan, a yude den e renobacionnan. Segun e propietaria e propiedad tin un energia special, y ta yen di hert, beer y aguila, E palonan di mata e conoce henter su bida, y ta rondona di naturalesa riba e dia di su casamento tabata hopi poderoso.
