E pareha forma pa Cristiano Ronaldo y Georgina Rodríguez no ta perde un chens pa mustra con feliz nan ta, y pa exhibi un estilo di bida magico y amoroso riba nan rednan social. Nan ta documenta cu bastante frecuencia e momentonan mas special di nan dia na e ciudad di Turin, principalmente nan rol como mayor di cuatro yiu encantador: Cristiano Junior, e morocho Eva y Mateo, y esun mas chikito cu yama Alana Martina, e unico yiu biologico cu nan tin hunto.
Di un manera hopi special e modelo spaño a felicita e strea di Juventus, riba e dia cu e astro di futbol a cumpli 36 aña di bida. E bunita modelo a dedica un post sensacional, unda e ta profesa su amor eterno y ta pensa riba e futuro yen di ilusion cu ta spera nan hunto. Y pa yega na bieu hunto cu e mesun ilusion di awe. “Feliz dia, feliz bida, amor mío! Cu Dios sigui aporta na nos bida tanto amor, salud y bendicion”, e modelo, tambe presentadora y futuro diseñadora a skirbi riba su Instagram. El a comparti algun potret cu ta manifesta nan complicidad y alegria, cu nan ta disfruta cada dia manera un pareha namora.
