Den edicion di februari ta ilustra den e seccion di Boneiro e pareha, Nathan y Nicole Senchi, cu a conoce otro na un evento di hubentud. Ambos tabata basta jong y nan tabata amigo di iglesia, y den e mesun circulo di amistad. Nicole Sordjo ta nativo di Surnam, pero fo’i su 7 aña e ta bibando na Boneiro, cu excepcion di 5 aña cu el a bay studia na Hulanda. P’esey e ta yama su mes Boneriano, paso el a biba mas na Boneiro cu cualkier otro caminda. Nathan ta identifica su mes como Boneriano, door cu el a sali for di Corsou cu 4 aña pa nan bin biba na Boneiro. Como cu fo’i chikito e tabata y te ainda gusta tur area di arte, musica, diseño y pintura, y cada un di nan e ta haci cu hopi pasion. E biahe di nan como pareha a inicia y dos aña despues nan a uni den matrimonio y na september ta cumpli 5 aña felizmente casa. Nan ta bendiciona cu un yiu muhe, Shae, y nan plan primordial ta pa sigui honra Dios den tur loke nan ta haci, mehora como famia y ta e miho mayornan cu nan por ta!
For di Corsou ta deslumbra den e revista cu su carisma, Carelli Troeman, un hende muhe cu ta posee un habilidad enorme pa sinti cierto grado di empatia, cu ta fortifica e humildad cu e tin den dje. Comunicacion ta e parti fuerte di Carelli; e sa con pa expresa su sentimentonan, pero alabes ta dispuesto tur momento pa scucha un otro persona. Su caracter por ta fuerte den e decisionnan drastico cu mester tuma, no di forma impulsivo, pero si e ta tuma e tempo necesario prome pa analisa e situacion di tur banda, cu ta un caracteristica di su signo Libra. Carelli tin curason na su luga, cual ta permitie reconoce su fayonan sin sinti berguensa. E ta traha na ENNIA, unda e ta laborando como Account Manager Business Partner. Pa Carelli e les di mas importante cu el a siña den e ultimo añanan ta, cu na momento cu saca bo for di un ‘comfort zone’ den cualkier etapa di bo bida, bo no mester cuestiona of protesta. Bo ‘roadmap’ di bida ta diseña caba y bo tin cu confia cu tur cos of hende cu bo topa den bo bida, tin nan proposito pa bo por yega na e loke cu realmente bo ta destina p’e.
Lesa mas di e entrevista di Nathan y Nicole Senchi, tambe di Carelli Troeman den edicion di FOCUS Digital di februari, cu ta acesibel via Apple Store of Android Google Play Store, cu por download e aplicacion aki riba un smartphone of tablet.
