ORGUYOSO CU ‘MAO’ TABATA E PROME CERTAMEN VIRTUAL

E fundador y organisador di Miss Aruba Online, Hendrik ‘Endy’ Croes, den su entrevista den edicion di FOCUS Digital di februari, ta elabora riba e certamen di Miss Online 2021. E aña aki tanto e parti di e reglanan como huzgamento a keda mescos. Den e prome encuentro via Zoom e candidatanan tabatin hopi pregunta tocante e ‘challenges’, mirando cu niun kier haya strafpunten, p’esey ta purba pa splica tur cos den mas detaye posibel, pa e ta cla pa tur hende. Mesun splicacion cu e candidatanan ta haya, e huradonan tambe ta ricibi for di e organisacion.

Endy a inicia cu e idea pa trece un cambio den e mundo di beyesa, y el a probecha e situacion di pandemia global, unda tur hende mester a mantene distanciamento social, pa organisa aña pasa un certamen cu un dinamica diferente, sano y innovativo. Ora cu a organisa Miss Aruba Online 2020 cu 11 candidata, e meta tabata pa e aña aki e certamen ta mas grandi, pero Endy no a spera cu lo mester a cera e inscripcion, pasobra e interes den cantidad di candidata tabata asina grandi. Den menos di 24 ora mester a cera inscripcion, pasobra ya caba a yega 15 candidata.

E exito di certamen aki ta debi, cu e no ta manera e certamennan tradicional y door di nan reglanan ta permiti mas candidata pa inscribi, pasobra nan a kita tur e presionnan di estetica tradicional, figura, estatura, estado civil, etc… no tabata importante. E huradonan a huzga puramente e esfuerso inverti di cada participante den cada reto. Tur participante mester a percura pa nan a haci cada reto di e miho forma posibel pa por resalta, unda e contenido ta sumamente esencial.

Ya por a cera conoci cu 10 candidata riba e rednan social di Miss Aruba Online y otro siman ta presenta e ultimo 5 participantenan. Lesa mas di e entrevista tocante Miss Aruba Online 2021 den edicion di FOCUS Digital di februari, cu ta acesibel via Apple Store of Android Google Play Store, cu por download e aplicacion aki riba un smartphone of tablet.

• 

• 

• 

• 

• 

• 

• 

• 

• 

•