E canciyer Angela Merkel a bisa cu Alemania ta awo den e di tres ola di e pandemia di coronavirus, segun fuentenan di e agencia di noticia Reuter. “Awo nos ta den di tres ola”, Merkel a bisa e legisladornan den su partido conservador cu a asisti na e reunion. Tambe a ser bisa cu e canciyer a advirti cu cualkier flexibilidad di e medidanan di blokeo introduci na fin di aña pasa, y extendi te cu 7 di maart mester wordo haci gradualmente.
“Nos no por permiti – ‘ups and downs’-”, Merkel a bisa den e reunion, sugeriendo cu e kier cualkier regreso na e bida normal wordo haci cu cuidao, pa evita pa tin cu reintroduci e medidanan di blokeo si e infeccionnan cuminsa aumenta atrobe. E ciere di tur negoshi no esencial y control di frontera cu Austria y Czech Republic, unda tabatin un brote relaciona cu un variante mas infeccioso di e virus, a yuda Alemania pa reduci e infeccionnan nobo diario di COVID-19.
Pero un implementacion lento di vacunacion y e riesgo di brotenan grandi di e variante, cu su propagacion ta rapido ya identifica na Alemania, por haci dificil cualkier flexibilidad di e restriccionnan. Durante e reunion, Angela Merkel a bisa tambe si pone e testnan disponibel pa haci mas rapido, esaki por haci un regreso na normalidad ta mas duradero, segun e fuentenan. E comentarionan reporta pa e canciyer a bin un dia despues cu su portavoz principal a suplica e cuidadanonan pa tuma e vaccine Covid di AstraZeneca, despues di a plama panico cu a pone cu e hendenan a rechasa di tuma e prik. Steffen Seibert a bisa dialuna cu e vacuna britanico ta ‘sigur y altamente efectivo’ y ta ‘salba bida’, y ta pusha e hendenan pa tume, solamente algun siman despues cu e ministronan a afirma eroneamente cu e no ta funciona den e hendenan mas grandi di edad.
