E golfer mericano, Tiger Woods, a keda hospitalisa awe mainta despues di a sufri un accidente di auto na Los Angeles. Woods mester a wordo opera pa multiple lesion na su pianan, despues cu su auto a bolter.
Tiger Woods di 45 aña tabata su so den auto cerca di Rancho Palos Verdes ora su auto a bolter aproximadamente 7.12 am. Ta parce cu el a sali di e caretera, bolter y cay na e rand di Rolling Hills Estates. E bomberonan mester a uza e dispositivo conoci como ‘jaws of life’ pa habri e auto y salb’e. Despues el a ser hiba na un hospital di Los Angeles, cu no ta conoci na cua e ta interna, unda el a wordo someti na un operacion pa coregi su multiple heridanan na su pianan, su agente Mark Steinberg a informa den un comunicado.
