E ultimo añanan e edicion di maart, revista FOCUS ta ilustra e hende muhenan exitoso den nan carera profesional. En conexion cu Dia Internacional di Hende Muhe cu ta celebra dia 8 di maart, ta duna merito na nos hende muhenan. E di tres edicion di FOCUS Digital di e aña aki ya por download ‘gratis’ y asina disfruta di e revista mas gusta tanto pa su contenido como su estilo innovativo. Riba e portada di maart ta ilustra Stephanie Thiel, cu a tuma su paso como entrepreneur cu hopi curashi. E kier ta un inspiracion pa motiva y educa tur persona rond di dje. El a obtene su dos diplomanan como Bachelor den Optometria & Ortoptica na Hogeschool van Utrecht. Ambos estudio ta di 4 aña, pero el a logra tur dos diploma den un periodo di 6 aña. Esaki ta haci cu Stephanie Thiel ta e unico Arubiano cu dos Bachelor Degree BHS, esta su titulo como Optometrist O.D. y Ortoptist BHS.
E luna aki e hende muhenan ta domina e contenido cu nan mensahenan poderoso pa inspira y motiva. For di Aruba por lesa entrevista cu Desiree Bikker, cu ta Director of Learning, Talent Development and Acquisition di The Ritz-Carlton, Aruba y tambe e ta parti di e trainers internacional pa Marriott. E diseñadora, Rekha Croes-Daryanani, cu a lansa su coleccion ‘Papiamento’, cu ta e cadenanan traha cu e palabranan di afirmacion na Papiamento. Despues di tanto rechaso, promesa y plannan cu a fracasa na Aruba, Marisol Vrolijk, ta realisando su soñonan na Boneiro, cu a sa di acept’e cu man habri y cu hopi calor.
Nos lo sigui elabora durante e siman aki riba e contenido di FOCUS Digital di maart, cu ta un experencia unico pa ‘browse’ y lesa e revista, cu tin su contenido di calidad manera semper. FOCUS Digital ta acesibel via Apple Store of Android Google Play Store, cu por download e aplicacion aki gratis riba un smartphone of tablet.
