Tempo cu Brad Pitt ainda tabata pareha di Angelina Jolie, el a dicidi di demostra su amor cu un regalo hopi special, un cuadra cu ta data di 1943 y el a wordo pinta pa nada menos cu e ex-prome minister di Gran Britania, Winston Churchill. Ta trata di ‘Tower of the Koutoubia Mosque’, cu Churchill a regala na ex presidente Franklin D. Roosevelt durante World War II. Na aña 2011 Brad Pitt a cumpra e pintura di un comerciante di antiguedad na New Orleans, y el a regal’e na su casa e tempo ey. E amor entre nan a caba na 2016 y mientrastanto Angelina a dicidi cu a yega ora pa deshaci di e pintura.  

E prijs original tabata 2.95 miyon dollar, sinembargo e prijs a triplica y segun reporte di algun medio manera CNN, den e subasta realisa dia 1 di maart, el a alcansa 11.5 miyon dollar. Segun e site di Page Six, tempo cu Brad Pitt a participa den e pelicula riba World War II di Quentin Tarantino, ‘Inglourious Basterds’, su interes a lanta pa e obra di Churchill. Segun CNN, Churchill a pinta ‘Tower of the Koutoubia Mosque’ na Marrakech, Marruecos, despues di a asisti na Washington Conference na januari 1943, y a regale na e president di Merca, Franklin D. Roosevelt.

E obra ‘Tower of the Koutoubia Mosque’ ta wordo considera como e cuadra mas importante di Sir Winston Churchill door di su relacion cu e historia di siglo XX, segun e historiador di arte britanico Barry Phipps den e catalog di e subasta. Cu Churchill a regala Roosevelt e pintura ta subraya e echo cu Churchill tabatin un aprecio hopi grandi p’e y ta señala nan esfuersonan hunto pa guia e potencianan aliado pa e desenlace di World War II. Ademas di e cuadra aki tin dos di e obranan di Sir Winston Churchill, cu a wordo bendi na un prijs hopi mas halto cu nan a spera durante un benta nocturno na Christie’s “Modern British Art”.  

LEAVE A REPLY

Please enter your comment!
Please enter your name here