Meghan Markle y prins Harry a dicidi di ‘kibra e silencio’ den un entrevista hopi relevador y cu a resulta mas impactante cu hopi a spera, den cual e golpinan cu e ex-actriz y incluso e prins a dal na House of Windsor, por pone un precedente cu ta bay haci historia, algo cu ni prinses Diana a logra. Loke a ser bisa durante e dos oranan pa e pareha ta laga bon cla cu e famia real britanico no a cambia su forma di actua desde nan origen, algo cu no por cuestiona: e corona ta mas halto cu e interesnan personal, aunke si ta trata di nan propio famia.
E yiu di ‘Lady Di’ a bisa cu semper e lo stima su tata, pero tabatin hopi dolor y cu e lo continua haci un prioridad pa sana nan relacion. Un di e momentonan dificil pa Harry ta ora el a comparti, cu si no tabata pa Meghan, e lo no a scapa y cu su ruman y su tata ta ‘atrapa’, y cu nan no por sali y ta sinti compasion pa nan. Meghan a confesa cu tabata existi preocupacion di un miembro di e famia real pa e color di cuero di su yiu, Archie Harrison. Harry a confirma cu e comentario tabata na principio di e embaraso di su casa y a indica cu nunca e lo bay comparti e combersacion ey, cu e no ta sinti comodo papiando di esey. Mientras awe mainta Oprah Winfrey a confirma cu no ta ni Reina Elizabeth ni Duke di Edinburgh, ken a haci e comentario aki. Esey ta loke e prins Harry a bise mientras nan no tabata grabando.
Un otro bom cu Meghan a los tabata momento cu el a revela cu ta su cuña ta esun cu a pone yora algun dia prome di su enlace na 2018, y no net robes manera a ser bisa. Un comentario cu a afecta Meghan su sentimento, tabata algo tocante e shimis di e bruidmeisjes, parce cu Kate Middleton no a gusta. Meghan a comenta cu e siman di e bruid tabata hopi duro, y Kate tabata disgusta pa algo, pero el a disculpa y trece flor cu un nota pa disculpa su mes. Aunke Meghan a bisa cu el a perdone di curason, toch el a haci dolor pa mira cu e storia a filtra den prensa y cu a lag’e mustra e malo di e pelicula. Loke tabata dificil pa e supera cu nan a culp’e pa algo cu e no a haci, pero cu a pasa cu ne. Meghan a bisa cu e lo a prefera cu Kate por a coregi e informacion ey, pero tambe e ta consciente cu kisas nan no a lag’e hacie.
Cu lagrima na wowo e dukesa a bisa Oprah Winfrey cu e stress di su rol a bira asina malo, cu el a sinti suicidio como e resultado di tanto presion cu e tabata bou di dje. E no tabata kier ta mas na bida, un pensamento hopi real, constante y espantoso. El a bisa cu e no tabata kier a bisa Harry na comienso door di perdida cu el a sufri como resultado di e morto di su mama, pero el a hacie y el a apoy’e. Meghan a bisa cu el a roga un senior member di e realesa pa dune asistencia pa haya ayudo pa su problema di salud mental, pero nan a lage ta sufri su so. E duke di Sussex a revela cu si el a wak ‘The Crown’, y a confirma cu el a distancia di su tata, prins Charles, despues di ‘’Megxit’, ya cu el a stop di contesta su yamadanan. Entre tur e revelacionnan durante e entrevista polemico aki, un bunita noticia a keda comparti cu Meghan y Harry ta sperando un yiu muhe.
E corant mas bendi di Alemania, Bild, a publica e storia di Harry y Meghan riba front di nan website y a skirbi cu e entrevista tabata pio di loke e miembronan di realesa a spera. E tabata e entrevista di aña. Loke e pareha a revela den e talk show di Oprah Winfrey ta dificil pa supera pa su explosividad. E corant suizo, Blick, a bisa cu Harry y Meghan a describi e bida den e famia real britanico asina espantoso, cu scapando ta e unico forma pa sobrevivi. Un experto, Flavia Schlittler, a bisa den un video online di Blick, cu e acusacionnan di racismo tabata un declaracion di guera contra e famia real. El a describi e entrevista como e pio cu por a pasa e famia real, mientras cu Blick a señala con e otro miembronan di realesa a demostra di a ignora esaki.
