E vacuna contra coronavirus di Pfizer Inc y BioNTech SE ta efectivo den blokia e malesa, y e hendenan cu a ricibi e vacuna a mustra un porcentahe di infeccion ‘dramaticamente mas abou’ den un estudio nobo cu a ser realisa. E investigadornan di e empresanan, cu a asocia cu e Ministerio di Salud di Israel, a bisa awe cu e vaccine tabata 97% perfecto pa preveni e casonan sintomatico, hospitalisacion y morto.
Ademas e prik tabata 94 porciento efectivo pa preveni e casonan asintomatico, loke ta significa cu e inenting por reduci drasticamente e transmision. Esunnan cu no ta vacuna tabatin 44 biaha mas probabilidad di desaroya COVID-19 sintomatico y 29 biaha mas probabilidad di muri pa causa di e enfermedad, ta loke cu e investigadornan tambe a conclui.
”Esaki ta demostra claramente e poder di e vacuna Covid-19 pa combati e virus aki”, Yeheskel Levy, director di Ministerio di Salud, a bisa den un comunicado. “Nos obhetivo ta pa logra un aceptacion ainda mas grandi di e hendenan di tur edad, loke ta duna nos speransa di recupera e funcion economico y social normal den un futuro no hopi lehano”. E estudio a ser realisa for di e datonan colecta entre 17 di januari y 6 di maart 2021, ora e vacuna Pfizer-BioNTech tabata e unico disponibel na Isreal.
