Despues di 12 aña Karena a bolbe drenta studio pa graba un cancion. E prome biaha tabata un bunita Gospel titula ‘Maria Magdalena’ den bachata. Awo el a lansa su cover ‘E miho version di mi mes’. Un cancion original na spaño di Natti Natasha cu un bunita mensahe di superacion personal.
Karena no ta un persona desconoci den mundo di farandula. E ta modelo plus size y un inspiracion pa hopi dama na Aruba, despues di a kibra silencio di su experiencia cu violencia domestico. Actualmente tin hopi ta bibando hunto cu ne con e ta superando su mes cada dia. El a haci su regreso den e mundo di canto den gran forma cu un video clip simpel, pero cu un presentacion cu poco biaha bo ta mira un artista transmiti un cancion cu tanto pasion.
Traduccion di e cancion aki a wordo haci pa Karena Maduro mes, cu p’e no tabata dificil door di su bon conocemento di e idioma Spaño. E ta conta con riba un dia el a haya e inspiracion diripiente, cantando den su hogar. El a dicidi di pasa man pa su agenda y un pen, y a pone como meta di no stop di skirbi te ora e ta full cla cu e traduccion. Di biaha el a tuma contacto cu Hubert Thiel y a schedule e grabacion di biaha Mirando e situacion actual, un videoclip no tabata un opcion, pero danki na Loui Henry Entertainment esaki a bira un realidad.
