E strea di ‘Keeping Up With the Kardashians’ ta uni cu e proximo esfuerso electoral pa e destitucion contra e gobernador actual Gavin Newsom. Caitlynn Jenner a anuncia ayera cu e lo postula pa intenta di converti den e proximo gobernador di California. “I’m In!”, Jenner, a skirbi den un anuncio riba su Instagram. Jenner a agrega mas despues: “Sacramento mester un lider cu ta honesto y tin un vision cla”, apuntando na e gobernador actual Gavin Newsom.
E gobernador Newsom (53) cu ta e lider actual di e estado democratico, a enfrenta diferente critica di e republicanonan den medio di e pandemia di COVID19. Un campaña republicano reciente a obtene suficiente firma den tur e estadonan pa obliga Newson enfrenta un eleccion revocatorio. E ultimo eleccion revocatorio di California a sosode na 2003, ora e ex-strea Arnold Schwarzenneger a gana e cargo. Caitlyn Jenner a informa e publico di e noticia riba diabierna; “durante e ultimo decada, nos a wak e briyo di Golden State reduci door di un gobierno di un partido, cu ta coloca politica riba progreso, y interes personal di e hendenan”.
Caitlynn Jenner a skirbi tambe riba su Twitter bio: “Bale la pena pa lucha pa California”. Jenner ta presenta su mes como un persona socialmente liberal y fiscalmente conservativo, segun un di su asesornan di campaña a bisa na media. Segun e informenan, Jenner a forma un ekipo di campaña cu ex-advisornan di Donald Trump, incluyendo Trump su encuestador principal di campaña, Tony Fabrizio, y ex-asesor di comunicacion di ‘White House’, Steven Cheung. Jenner a expresa su apoyo na e campaña di Trump na 2016, pero a revoca su apoyo despues cu e ex- presidente a revoca e reglanan federal, cu ta proteha e derechonan di e personanan transgender pa uza baño. “Ami a kere cu Trump lo yuda hende transgender”, Jenner a skirbi na 2015 den Washington Post. “Mi tabata ekiboca”. Jenner tabata flirteado cu e idea di postula su mes pa un cargo estatal na California den e ultimo añanan. Anteriormente el a nenga su plan di postula pa gobernador na februari.
