E musico Willie Colón, conoci tambe como ‘El rey de la salsa’, a ser interna den un hospital na Virginia na Merca, despues di a sufri un accidente di trafico ora e tabata biahando den un autocaravana cu su casa, Julia, segun un comunicado di su hefe di comunicacion, Neil MacCarty. Willie Colón ta den un ‘estado grave, pero estable’, segun e comunicado, cu ta detaya cu e siniestro, califica como ‘potencialmente mortal’ a pasa dia 20 di april ora e tabata biahando den e region Outer Banks, na North Carolina. E matrimonio mester a wordo saca di e vehiculo pa e ekiponan di asistencia debi na e estado cu e vehiculo a keda despues di e accidente, y e artista a ser traslada pa e hospital di Sentara Norfolk.
Su portavoz a indica cu Colón a sufri ‘traumatismo craneoencefálico’ cu hersenschudding, cortanan na su cabes pa cual el a haya 16 punto y fractura den su cervical C1, na e base di su schedel. Ademas segun e informacion cu manera esaki ta posibel, e lo ser traslada pa su ekipo medico pa e hospital Presbyterian na New York. E casa di e artista, Julia Colón, a sufri di corta- y slanan na su curpa, unda despues di a ricibi tratamento na hospital di Outer Banks, ya e por a bay cas. Mientras cu e comunicado no ta duna e detayenan tocante e causa di e accidente, nan a sigura cu no tin niun otro vehiculo involucra den e siniestro.
