E Duke y Dukesa di Cambridge ta celebra nan di dies aniversario di matrimonio awe, cu e lansamento di dos potret, cu e ser saca e siman aki na Kensington Palace pa e fotografo Chris Floyd. Riba e potretnan Kate a luci un ‘wrap-dress’ blauw, mientras Prins William a bisti un sweater navy blue riba un camisa. Den e prome potret, e pareha ta sinta den e hardin di e palacio cu tin fondo di yerba berde y palo di mata.
Den e di dos potret e pareha a mustra mas afeccion cu nunca antes, den un abraso cu no ta tipico di e duo. Durante e añanan e pareha a abstene di e demostracionnan di afecto, ya cu e no ta den e linea cu e protocol real, pero ta parse pa nan di dies aniversario esaki ta un ocasion suficientemente bon, manera cualkier otro pa mustra un poco di amor.
Kate Middleton y Prins William a casa na Westminster Abbey den un ceremonia di ‘cuento di hadas’ dia 29 april 2011. E pareha a pasa nan prome añanan di matrimonio bibando na North Wales mientras William tabata traha como piloto ‘search and rescue’ den RAF. Nan a establece awo como e miembronan destaca di famia real como e futuro rey y reina ‘consort’. Nan tin tres yiu: prins George di 7 aña, prinses Charlotte cu ta cumpli 6 aña diadomingo awo, y prins Louis cu a celebra su di 3 cumpleaño siman pasa.
