Matthew Stubbings, di Doncaster, South Yorkshire, a afirma cu Stormy, cu a ser asigna como un mucha muhe ora el a nace, a cuminsa mustra e señalnan di ta un mucha homber ora e tabatin 18 luna, ya cu semper el a odia paardenstaart, shimis y sapato bunita. E tata di e mucha trans di cuatro aña a afirma, cu e adultonan ta lucha pa acepta cu su yiu ta mucha homber, ya cu hopi ta keda insisti pa yame mucha muhe. El a bisa cu na e edad di tres aña, Stormy cu antes tabata conoci como Emerald, por a bisa: “Mi no ta un mucha muhe, mi ta kere cu mi ta un mucha homber” tanto na su tata como na su mama Klara Jeynes, di 44 aña. Pero e tata di e mucha a agrega cu e tabata un temporada hopi duro, pa logra cu algun adulto acepta e decision di Stormy, ya cu hopi cu nan ta topa ta insisti ainda pa yame un mucha muhe.
E gerente di division di un empresa di mantenimento di highways, a publica recientemente un homenahe conmovedor pa su yiu riba LinkedIn y el a comparti un potret di Stormy cu su corte di cabey nobo estilo ‘spiky’. E tata a bisa: “Esaki ta un di mi yiunan. Un mucha spierto y feliz cu ta stima su bida. Loke hopi hende no sa cu ora el a nace el a wordo ‘gesekst’ como un mucha muhe. Su identidad di genero, loke ta den su cabes, no ta coincidi cu su sexo fisico. Mi ta hopi orguyoso cu e sa ken e ta y no ta limita pa e norma- y e prehuicionan social. Nos tur por siña algo di e mucha chikito aki y ami ta siña tur dia. Nos tur ta diferente. Aceptando e hendenan pa loke nan ta, ta e unico forma di fomenta innovacion, crecemento y probecha e miho di tur hende. Su post riba LinkedIn a ricibi casi 300 reaccion y hopi comentario pa elogia e mensahe cu ta inspira.
Segun e tata cu Stormy a cuminsa mustra e señalnan di gender dysphoria prome cu e por a papia, e tabata ansioso pa uza paña di mucha homber manera su morocho Arlo. E mucha a mustra tambe interes pa e bombero- y e polisnan, mientras e tabata haya stress cu su paardestaart, loke a pone cu su mayornan tabatin algun charla ‘bastante adulto’ cu ne tocante su identidad. “A yega un punto cu su cabey a cuminsa bira mas largo y e no tabata kier a uza paardestaart mas. Nos a kite. Ya e no tabata gusta uza shimis y a yega un punto cu si e no bisti paña di mucha homber, e no tabata feliz”. Matthew a agrega: “Mi a dicidi di post tocante Stormy pasobra mi ta excepcionalmente orguyoso di dje”.
