Prins William y Prins Harry a reacciona riba e investigacion oficial riba e circunstancianan cu a conduci, cu nan mama defunto a haci e entrevista cu BBC Panorama na 1995. Den un comunicado ayera, William a critica fuertemente e “forma engañoso den cual a haya e entrevista” y a defende su kerida mama.
“Mi ta desea di gradici Lord Dyson y su ekipo pa e informe”, e Duke di Cambridge a cuminsa cu su declaracion, gradiciendo e hues britanico, John Anthony Dyson, ken a dirigi e investigacion. “Ta welcome cu BBC ta acepta den su totalidad loke Lord Dyson a descubri – cu ta extremadamente preocupante – cu e empleadonan di BBC: a gaña y uza e documentonan falso pa obtene un entrevista cu mi mama: nan a haci declaracion teribel y falso riba e Famia Real, cu a hunga cu su temornan y a alimenta paranoia; a mustra un incompetencia lamentabel ora a investiga e keho- y preocupacionnan tocante e programa: nan no tabata cla den nan reportahe na e medionan y a tapa loke nan tabata sa di nan investigacion interno”.
William a continua: “Den mi opinion, e forma engañoso con a obtene e entrevista a influi sustancialmente den loke mi mama a bisa. E entrevista tabata un contribucion importante pa haci e relacion di mi mayornan pio y desde e tempo ey a perhudica innumerabel persona”. Lord Dyson a publica e informe tocante si e reportero di BBC. Martin Bashir, a gaña e ruman di Diana, Charles Spencer, pa present’e e prinses. Den e entrevista, pa Panorama na november 1995, Diana a bisa cu “tres di nos den e matrimonio, pues e tabata un poco yen”. El a divorcia di Charles e siguiente aña y a muri tragicamente despues den un accidente di auto na Paris na 1997.
Desde su mansion na California, Prins Harry tambe kier a halsa su stem cu e resultado di e investigacion y incluso el a bay mas leu cu su ruman: “Nos mama tabata un muhe increibel cu a dedica su bida na sirbi. E tabata resiliente, balente y incuestionablemente honesto. E efecto di un cultura di explotacion y e practicanan no etico, a termina pa caba cu su bida. Esunnan cu a tuma algun tipo di responsabilidad, danki pa haci nan mes responsabel. Esey ta e prome paso pa husticia y e berdad. e Duke di Sussex, a expresa a traves di un comunicado.
