Rotaract Club of Aruba ta organisando mayan dia 30 di mei nan di 7 edicion di You Inc. Seminar, e aña aki pa prome biaha virtual, na Papiamento y completamente GRATIS! Manera semper You Inc. Seminar kier brinda desaroyo profesional y tambe personal na cada un individuo den nan bida diario.
E tema di e seminario lo ta “Reinventa Bo Mes”
Cu e pandemia actual a bin hopi cambio den nos bida, cosnan cu a pasa cu a afecta nos trabou, nos manera di comunica, nos bida social y profesional. Esaki a trece inseguridad y duda pa mayoria hende personalmente y/of profesionalmente. Hopi no tabata prepara pa por a deal cu e situacion actual. Cu e seminario aki You Inc. kier brinda e ideanan, tips y tricks, pa sobresali inspira y motiva pa sigui pa dilanti of encurasha pa tuma e stap pa un comienso nobo y alabes reinventa bo mes.
You Inc. Seminar 2021 lo consisti di 3 panelista y como invitado special Jandino Asporaat. E mainta aki lo tin como hosts y moderador Larissa Bermudez y miembro di Rotaract Club of Aruba: Jair Vesprey.
E panelista nan lo ta:
Rocío Burgos – Branding Specialist. Rocío lo elabora riba business y personal branding. Haña sa poco “tips and tricks” con pa brand bo mes y/of bo compania.
Johnny Boekhoudt – Psicologo forensico. Johnny lo bay elabora riba salud mental. Un tema sumamente importante, mirando con nos bida diario a wordo afecta door di e pandemia actual.
Herrick Henriquez – Director di Aruba Trade & Industry Association (ATIA). Herrick lo elabora riba finansa y tambe entrepreneurship door di su añanan di experencia den e areanan aki riba diferente nivel.
Como invitado special e aña aki ta Jandino Asporaat, naci na Curaçao, bibando na Hulanda. Jandino ta conoci den nos comunidad como un comediante, cu su rolnan sumamente popular como Judeska, Gerrie y Koffie, caminda el a sa di destaca y crea un nomber pa su mes den Reino Hulandes. Loke mayoria no sa ta cu Jandino tambe a converti su mes exitosamente como un entrepreneur den area di television, pelicula, skirbi buki, tienda di paña y un negoshi di produci programa pa television y pelicula. Jandino como invitado special lo bay elabora con el a reinventa su mes riba e caminda pa exito y tambe e lo conta con un di su soñonan ta di uni e islanan den Caribe pa colabora mas intensivo. Su trayectoria di exito ta uno di aspira y admira.
Sintoniza mayan 30 di mei 10or di mainta pa 12or di merdia LIVE y completamente GRATIS via Facebook page di Rotaract Club of Aruba y na canal di TeleAruba. Haña sa mas over di e topiconan interesante cu lo wordo presenta durante e seminario e aña aki.
Por sigui e trabounan cu Rotaract ta haci via Facebook: Rotaract Club of Aruba of via Instagram: @rotaractaruba. Pa mas informacion di nos club por bishita www.rotaractaruba.com
