Desde instalacion y presentacion na prensa y na Aruba di e candidatanan pa e certamen di Miss Youth Aruba 2021, te cu awe cu ta bay elegi Miss Press, Miss Elegancia y Best Hair Do, e president y organisado, Robin Croes, ta sumamente contento con tur cos a bay y ta bayendo. E ta hopi satisfecho cu cada un di e cadidata-, preparador-, estilitista-, mayor- y tambe e sponsornan. Tur cos a bay manera el a planea, aunke semper por surgi cosnan acerca of por cay cosnan fo’ i schedule, sinembargo semper Robin tin plan B.
E organisacion a percura pa e candidatanan ta bon prepara pa awe nochi. Nan a haya les di oratorio, public speaking, Q&A, con pa contesta un pregunta y con pa formula un contesta. E candidatanan a siña tambe pasarela y pose, kiermen e organisacion a percura pa tur ta bon prepara y tur esaki ta forma e pakete completo pa awe nochi. Robin ta hopi orguyoso di bisa cu nan tin 12 candidata bunita y inteligente, cu nan manda sea un of tur diesdos pa subi un avion pa representa Aruba internacionalmente, sin duda nan por saca cara di Aruba y esey ta loke ta haci Robin su curason hopi contento.
E show awe lo ta uno espectacular cu ta yena di glamour, elegancia y inteligencia, unda tanto e candidatanan como nan preparador/estilista lo concursa den e caterogia pa Best Hair Do. Normalmente ta haci esaki riba e anochi final, pero e biaha aki a inclui e premio aki riba e anochi di elegancia y press. E huradonan ta bay back stage pa husga e categoria aki, prome cu e candidatanan sali den publico. Despues di esaki e show ta cuminsa cu un fashion show di Line of Style, unda cada candidata lo modela dos outfit. Despues di e fashion show lo tin e coronacion di Alexia Chin, 4th Runnerup Miss Youth 2019, cu ta bay representa Aruba na Reina Internacional de Los Mares y Turismo na Costa Rica na Augustus. E organisacion tin e honor cu Minister President, Evelyn Wever-Croes, lo haci e coronacion di Alexia Chin.
Despues di e coronacion di Alexia lo sigui cu e show pa scoge Miss Elegancia. unda cada candidata lo modela den mesun estilo di shimis, pero den diferente color. Siguientemente lo pasa pa e parti di Miss Press, unda cada candidata lo haya un par di pregunta for di prensa. Despues ta saca e ganador di Best Hair Do, cu ta un premio pa e estilista, ta continua pa anuncia e Top 3 sin orden specifico pa sigui pa 2nd -1st y ganador di Miss Press, y den mesun forma lo scoge e categoria pa Miss Elegancia.
Robin Croes di Miss Youth Aruba ta gradici pa cuminsa Patio15 y Marc Benson, y tambe Line of Style cu a pone e pañanan disponibel pa e fashion show. Despues di awe nochi cu ta uno grandi, e organisacion lo bay focus riba e anochi final dia 3 di juli. E tema pa celebra e prome lustro di e certamen ta ‘Viva la Fiesta’ y lo ta un anochi di celebracion cu hopi fantasia y briyo celebrando nan di 1 lustro en grandi. Un show al estilo Las Vegas. Tur e ex-reinanan lo haci un show hunto cu e actual candidatanan.
