Pa e di seis edicion di e aña aki, revista FOCUS digital tin riba su portada un hoben sobreviviente di cancer, cu ta comparti su biahe personal y con e diagnostico a impacta su bida. Yarimar Méndez a ripara cu algo tabata malo cu su salud, ora cu su condicion fisico a cuminsa baha. E tabata practica e deporte y arte di ‘Aerial Silks’ y tabata den bon condicion. Cierto momento e no tabatin e mesun prestacion di antes. El a bira malo y a keda interna den hospital, unda el a pasa den tur test posibel. Sinta hunto cu su mayornan den oficina di e oncologo, nan a haya e noticia di e diagnostico cu Yarimar tabatin cancer. For di Aruba el a biaha pa Colombia den rolstoel, unda el a keda 1 aña pa su tratamento, y Yarimar ta conta di henter e proceso te ora cu e por a bolbe Aruba.
Den un solo aña a tuma 3 cambio grandi den Gregory ‘Greg’ Croeze su bida. Un di e cambionan aki, cu a impacta su bida ta ora el a bira tata. E nacemento di su yiu muhe, Amelia Adalyne Alyzé Croeze, e por describi como e momento di mas feliz, y cu tur cos den bida ta yega na e momento perfecto. Despues di casi 40 aña, Kiwanis Club of Aruba tabatin e honor y privilegio cu un di su miembronan, Robert ‘Bob’ Spellen, por a ocupa e cargo di Gobernador di Eastern Canada and the Caribbean District 2019-2020. Un experiencia unico pa e famia di Kiwanis na Aruba, sinembargo locual a haci esaki mas memorabel ainda ta, cu Bob a ricibi e status di ‘Distinguish Governor’. Logrando e reconocimento aki, memey di un pandemia, tabata un reto mas grandi
Ex-Miss Aruba y modelo, Tracey Nicolaas, ta actualmente rebibando varios aspecto di su prome embaraso. Su yiu homber Denzell a nace na december 2018 y awo Tracey ta sumamente ansioso hunto cu su pareha, Omar-Steve Lejuez, pa conoce nan di dos yiu, un prinses cu ya tin su nomber. E bida di Ann-Nicolle Thijsen como studiante na Hulanda no ta uno facil. paso e no a haya Arubalening sino DUO, cu a haci cu e mester a traha y studia pareu. Den su ultimo aña na MBO el a bin riba e idea pa habri su mes negoshi A&T-Marketing. E fecha, 25 di juni 2021, ta uno hopi decisivo y crucial pa loke ta trata futuro di pais Aruba. Focus a acerca diferente votado, pa haya un bista loke comunidad ta sinti y mira pa e proximo eleccion.
Lo sigui elabora den un siguiente post riba e contenido di FOCUS Digital Magazine di juni, cu ta un experencia unico pa ‘browse’ y lesa e revista. E ta acesibel ‘gratis’ via Apple Store of Android Google Play Store, cu por download e aplicacion riba un smartphone of tablet.
