CAS TAN TIN a reuni hunto cu 4 studiante di aña 3, di e estudio pa Maestro MUSEO di Scol Basico y di Scol Preparatorio di Instituto Pedagogico Arubano (IPA). Den cuadro di e tarea social cu e studiantenan di IPA tin cu cumpli cu ne prome cu nan finalisa nan estudio, nan mester crea un proyecto educativo & divertido pa mucha. Hunto cu e Team di Museo Cas Tan Tin e studiantenan a combersa riba diferente topico cu ta di importancia pa siña nos muchanan, kendenan ta nos futuro generacion di Aruba.
Ta un grato placer pa e Team di Museo Cas Tan Tin di por bay traha hunto cu e studiantenan Giandra Dijkhoff, Bethel Matos, Samantha Setrodjemino y Norine Werleman. Ta prome biaha cu Museo Cas Tan Tin ta bay duna oportunidad na e studiantenan di IPA, pa prepara, planea y ehecuta dos actividad educativo-cultural pa mucha. E studiantenan lo bay traha riba un guia pa muchanan di 4 te cu 6 aña di un scol Preparatorio. E di dos actividad lo ta pa un klas di scol basico pa muchanan di entre 6 te cu 9 aña.
E studiantenan lo haya asistencia di un parti di e Team di Museo Cas Tan Tin cu ta consisti di Mavis Krozendijk, Lourdes Martis-Bermudes y Elvis ”Jimmy” Hill. E prome encuentro a tuma luga na MUSEO CAS TAN TIN, situa na Pos Abou 19 na Noord, unda e studiantenan ta bay traha riba algun idea cu nan ta desea di mira bira realidad. E programa lo consisti di dos parti: uno unda e alumnonan lo haya un tour den e cas completo, pa nan mira con nos antepasadonan tabata biba. E di dos parti lo ta un presentacion di varios trahe tipico di Aruba.
