Serena Williams a admiti cu el a keda desconsola despues cu el a wordo obliga pa retira for di Wimbledon den e prome round door di un lesion, cu el a sufri ora el a slip riba e cancha central. E tenista di 39 aña, cu tabatin e speransa pa reclama e record igual cu di 24 Grand Slam na e torneo na London, a bay riba Instagram pa comparti su disgusto pa e incidente, mientras cu el a agradeci su fanaticada pa nan ‘apoyo’ ora el a bandona e cancha cu lagrima na wowo.
“Mi curason tabata kibra pa retira awe despues di a lesiona mi pia drechi”, el a skirbi ayera riba su Instagram. “Mi amor y gratitud ta cu e fans y e team cu ta haci pa ta riba e cancha central ta asina significativo”. Serena cu a slip den e di seis wega den e prome round contra Aliaksandra Sasnovich, no a comparti niun otro detaye tocante su lesion, ni a revela si esey por strobe di participa den e proximo US Open, cu lo cuminsa dia 30 di augustus.
Sinembargo, el a elogia e multitud na Wimbledon, cu a dune animo ora el a bolbe riba cancha despues di un descanso di 10 minuut, durante cual el a ricibi tratamento medico, agradeciendo nan pa demostra un afecto extraordinario. E oponente Sasnovich a bisa riba cancha, cu e ta tristo pa Serena. E ta un gran campeon. Tin biaha e cosnan aki ta pasa den tenis, pero e ta desea tur cos bon pa su recuperacion.
