E polifacetico cantante italiano, Raffaella Carrà, conoci pa su temanan manera: ‘A far l’amore comincia tu’, ‘Tanti Auguri’ of ‘Caliente, Caliente’, a fayece cu 78 aña di edad, segun e medionan na Italia a informa awe. E noticia a ser comparti pa Sergio Japino, cu tabata su pareha cu e mensahe: “Raffaella a bay laga nos, el a bay laga nos. El a bay pa un mundo miho, unda su humanidad, su inconfundibel risa y su extraordinario talento lo briya pa semper”.
Raffaella Maria Roberta Pelloni a nace na Bolonia na1943. Manera e diario Como ‘Il Sore 24 Ore’ a señala cu e idea di ‘Carrà’ tabata un idea di e director y guionista, Dante Guardamagna, cu ta esun cu a sugeri pa e keda cu e nomber di Raffaella (cu ta recorde na e pintor genial di Renacimiento Rafael) y combine cu e fam di otro gran artista italiano, Carlo Carrá. Den e decada di 60, tempo cu Raffaella tabata den su 20 aña, e kier a sigui e pasonan di otro muhenan italiano, cu a sa di logra exito na Merca, manera Sofía Loren, y el a bay Hollywood pa purba su suerte den cine.
Tempo cu Raffaella tabata chikito e tabata soña pa ta un coreografo. Sinembargo su prome pasonan tabata den cine. Desde su comienso e tabatin un bon strea, y un di su prome peliculanan ‘La lunga notte del 43’, a ser presenta den e prestigioso Festival di Venecia. Raffaella no tabatin ni 18 aña e tempo ey. Ya na Los Angeles, e italiana a logra un rol den e pelicula ‘Von Ryan’s Express’ hunto cu Frank Sinatra. E fama di Raffaella den e mundo musical ta door di un produccin di Broadway: e musical ‘HAIR’, cu tabatin hopi impacto na final di añanan 60. E tabata relata e tema di revolucion sexual, droga y tabatin inclui desnudo di e actornan den algun escena. Raffaella a wak e na Francia, y el a bin cu e idea pa aplica e estilo picante aki na un Italia ainda conservador. Su bailenan, su movimentonan y mas cu tur cos su show di lombrishi a bira famoso na Italia den un epoca, cu no ta custumbra pa wak na television un muhe bariga afo.
