E actor Antonio Banderas a ser nombra como e coprotagonista mas reciente di Harrison Ford den e proximo pelicula di Indiana Jones, cu ainda no tin titulo. E anuncio di e casting a ser informa pa prome biaha pa Deadline, aunke no a revela ta kende Banderas lo interpreta of con importante su personahe lo ta den e pelicula, ya cu casi tur cos di e pelicula ta secreto.
Loke sa te cu awo ta cu Indiana Jones 5, a cuminsa wordo filma recientemente na Reino Uni, y cu su elenco ta inclui tambe e creador di Fleabag, Phoebe Waller-Bridge y e actor di Hannibal, Mads Mikkelsen. Boyd Holbrook, Shaunette Renee Wilson y Thomas Kretschmann tambe lo ta coprotagonista. E pelicula ta ser dirigi pa James Mangold (Logan, Ford vs.Ferrari), cu a reemplasa Steven Spielberg despues cu el a retira, loke ta converti Indiana Jones 5 den e prome den henter e serie cu no ta ser dirigi p’e.
Recientemente a surgi imagennan di Ford den e set, cu ta mustra e actor di 78 aña den su costuum. Fin di juni, Ford supuestamente a lesiona su schouder durante ensayo di un escena di pelea pa Indiana Jones 5, aunke no spera cu e lo afecta e produccion di un manera significativo, y e filmacion a cambia di rumbo rond di e actor mientras ta evalua e tratamento.
Falta ainda hopi prome cu e pelicula keda pa cla pa wordo estrena. Actualmente, Indiana Jones 5 ta poni pa ta den cinema dia 29 di juli 2022. E proximo pelicula ta e continuacion di Kingdom of the Crystal Skull di 2008. E franchise ta celebrando actualmente su 40 aniversario e aña aki, cu Raiders of the Lost Ark yegando e teatronan na 1981.
