Ora cu e modelo Katrina Scott a subi catwalk di Sports Illustrated Swimsuit fin di siman pasa, su trip riba e pasarela tabata mas cu djis un gig di modelahe. Pa e modelo di 37 aña esaki tabata un momento pa yuda inspira otro muhenan cu ta purbando di concebi. Scott, un fitness entrepreneur y mama di Isabelle di 2 aña, tabata memey di e tratamentonan di IVF, ora el a ricibi e yamada pidiendo pa e uni na e ekipo di e muhenan, cu tabata participando na e show di SI Swim Runway durante Miami Swim Week.
“Cu IVF, mi mester a haci un cirugia cu yama ‘hysteroscopy,” Scott, cu anteriormente a sufri dos aborto y un embaraso kimico, a conta na TODAY Parents. “Despues di esey, nan ta pone bo na e nivelnan halto di estrogen”. Describiendo e terapia hormonal como un ciclon emocional, Scott a admiti cu e no tabata sintie cla pa uza un bikini ora e momento di e fashion show a yega – pero esey no a stop e pa rechasa e oportunidad. “Mi no tabata sinti mi prepara – e curpa hopi geblaas y e hormonanan, e cantidad di cos cu tabata pasando (cu mi curpa), pero mi a bisa: “Mi ta bay di acuerdo cu esaki aunke sea e ta un tempo di locura den mi curpa”, Scott a bisa.
Scott a cana riba e pasarela den varios trahe di baño y el a post su experiencia riba Instagram, bisando con orguyoso e tabata sinti di representa tur e muhenan eyfo, cu ta sinti cu ta mucho laat pa nan. E ta spera di representa e muhenan cu ta anhelando pa haci nan famia crece… cu por a experimenta perdida, tur e guereronan di IVF cu ta resando cada luna pa nan famia. E ta spera di representa e muhenan cu tabatin e aña mas difícil di nan bida, y demostra cu ainda tin luz y mantene cabes na halto y curason habri durante e momentonan dificil.
