Despues di tabata ‘date’ durante un aña, e socialité Paris Hilton a anuncia na februari su compromiso cu e empresario Carter Reum. E pareha a conoce otro pa medio di amigonan en comun, y a compromete durante un biahe na un isla priva, unda Hilton a celebra su 40 cumpleaño. Na varios ocasion, e pareha a bisa cu nan ta desea di forma un famia, y hasta a declara cu ya nan a haci e tratamentonan di fertilidad pa busca pa concebi un baby.
Segun e portal Page Six, e socialité ta na estado, sinembargo no a duna mas detaye tocante e noticia aki. Hilton a bisa algun luna pasa na e podcast ‘The Trend Reporter’ cu e nomber di nan yiu lo ta Londen, pasobra e ta nan ciudad faborito di henter mundo. A pesar cu Reum ta mantene su mes low profile riba e rednan social, algun dia despues di e compromiso el a declara den un entrevista, cu el a namora di Paris pa su amabilidad, su etica di trabou, su autenticidad y su empeño pa haci e mundo un miho luga.
