E team di Rotaract Club of Aruba ta den ful swing cu e coleccion y finalisacion di e proyecto anual di ‘Back To School project’ 2021. E proyecto aki tin como meta pa yuda nos muchanan bishitando scolnan basico na diferente districto rond di Aruba, cu e materialnan di scol pa asina habri un aña escolar cu confiansa.
Pa 29 aña caba Rotaract Club of Aruba su miembro y boluntarionan ta uni hunto cu famia y e maestronan bou di e proyecto ‘Back To School’. E aña aki e meta ta pa facilita 150 mucha di 4e, 5e, y 6e klas bayendo scol na diferente parti di Aruba, cu e articulonan di scol – entre otro uniform, potlood, pen, schrift, tas y mucho mas.
Claro, e proyecto aki no por (a) wordo realisa sin e ayudo di nos comunidad. P’esey, nos ta invita pueblo completo un biaha mas pa pasa na DYON CENTER e Diasabra aki 31 di juli 2021 pa yuda nos colecta e articulonan pa nos muchanan por tin otro aña escolar exitoso un biaha mas. Rotaract Club of Aruba ta gradici Aruba pa e cooperacion pa haci e proyecto aki un realidad.
