E actriz mericano, Christina Ricci (41), a hala hopi atencion ora el a mustra su bariga un dia despues di a revela cu su di dos yiu ta na caminda. Riba su account di Instagram Ricci a mustra riba su storia un potret di dje, unda e ta exhibi su bariga den un bh preto di Calvin Klein y panty blauw.
E nativo di California a comparti riba su instagram mas prome un potret di e ultrasonido di su baby, y a skirbi: “E bida ta sigui bira miho”. Despues e strea di e pelicula Casper, a tag su pareha, e estilista Mark Hampton (37) den e post . Na su turno e estilista a publica riba su propio cuenta di Instagram mas potret di e ultrasonido di nan baby.
Pa desea su pareha un feliz cumpleaño na juli ultimo, e actriz mericano a yam’e su -persona faborito, un ser humano bunita, cargado di tur loke ta hacie feliz, magico y bon- . Y e nominado di Globe Awards, a agrega e momento ey: “mi ta stima bo, e aña cu ta bin aki lo ta e miho te cu awor”.
Ricci su prome yiu Freddie (7) ta fruto di su matrimonio na aña 2013, cu e productor James Heerdegen cu no tabatin un final feliz. Ricci a ricibi un ordo di proteccion di emergencia contra di Heerdegen y Ricci a pidi full custodia di nan yiu homber.
