Panico y desesperacion total a surgi door di e multitud di 50.000 hoben, cu a bay wak e rapper Travis Scott. El a bira manera un ola di un movimento di e curpanan, cu no por a wordo frena. Algun di e hendenan a cay y otronan a lucha pa logra haya aire. Esnan presente a lanta e curpanan tira inconscientemente di nan amigo- of hendenan straño, y a ‘surf’ nan riba e audiencia, cu e speransa di hiba nan na un luga safe. Otronan tabata grita pa ayuda pa CPR y otronan tabata suplica pa e concierto caba.
Na final, ocho hende a muri entre e edad di 14 pa 27 aña, segun e autoridadnan di e ciudad. Masha hopi hende a wordo atendi na un hospital temporal instala cerca di e zona pa brinda atencion di emergencia na e heridonan of na e hospitalnan den cercania. Entre esnan cu a wordo trata esun mas jong tabata un mucha chikito di dies aña.
Travis Scott tabata yen di conmocion pa e situacion doloroso aki, y el a mustra su arepentimento pa loke a pasa, mustrando di ta dispuesto pa yuda tanto e autoridadnan como e famianan di esunnan cu a muri. A traves di su rednan social, Travis a comparti un mensahe dedica na e famianan di e victimanan, tambe pa esunnan cu a wordo herida, unda cu el a manda condolencia pero tambe ofrece su apoyo.
El a skirbi riba su cuenta di twitter: “Mi ta absolutamente destrui pa loke a pasa ayera nochi. Mi oracionnan ta dirigi na tur e famianan y esunnan afecta por loke a pasa na e festival”. Kylie Jenner y su yiu di tres aña, Stormi, y su ruman Kendall Jenner tambe tabata na e festival. Nan no tabata herida, pero tabata den shock pa loke a pasa. Despues di wak noticia, e influencer a kibra silencio y el a splica cu e y su pareha ta destrui.
Kylie a skirbi riba su perfil di Instagram: “Mi pensamento y oracionnan na tur hende cu a perde nan bida, a wordo herida of afecta di un manera of otro door di e eventonan di ayera. Y tambe pa Travis, cu ta profundamente preocupa pa su fanaticada di Houston”.
