E pareha a bisa otro “I do” ayera dia 11 di november na Los Angeles. Paris a post su potret riba Instagram y el a skirbi: “Mi pa semper ta cuminsa awe”. Paris a casa cu Reum na un propiedad di su difunto welo, Barron Hilton, na Bel Air despues di a compromete cu otro na februari. Pa su dia special e socialite y actriz a luci un bisti blanco di Oscar de la Renta cu dibuhonan di flor. Paris a revela riba Tonight Show cu lo tin hopi cambio di paña durante e celebracion di tres dia. “Mi tin hopi bisti, probablemente diez. Mi ta encanta cambia diferente paña”.
Carter Reum a propone na februari cu un renchi di diamante personalisa di Jean Dousset. Paris Hilton a skirbi riba su instagram e temporada ey: “Ora bo haya bo ‘soulmate’, no solamente bo sa, pero bo ta sintie”. Carter a bay riba rudia durante un biahe special na un paraiso tropical. Mientras nan tabata cana pa bay cena band’i lama, Carter a hiba Paris na un cabana dorna cu flor pa eynan propone matrimonio. E fiestanan cu lo sigui e proximo dianan, lo wordo capta pa e camaranan di e reality show, Paris in Love, cu su premiere tabata ayera y lo sigui tur diahuebs.
